دعوة للصيام والقيام

جماعة الإخوان المسلمين تدعو لصيام الإثنين وقيام ليلة الثلاثاء ومؤتمر صحفي عقب الحكم في العسكرية

لوحة الأسماء

السلام عليكم جميعا اولا :أعتذر عن تأخيرى فى الرد عليكم.ثانيا:الله يبارك فيكم جميعا وأشكركم على الترحيب بى معكم فى عالم التدوين وكمان على تشجيعكم لى.ثالثا:حلوه حكاية الخالتوهات دخلوا التدوين ضحكتنى كلمة الخالتوهات دى جدا رابعا: اسمحوا لى أرحب ترحيب خاص جدا بالدكتور عمرو مجدى وأشكره جدا على تفضله بزيارة المدونة وتعليقه القيم.خامسا:التعليق اللى كان نفسى أسمعه هو اللى جانى من (ولا بنخاف) بأشكرهم جدا ونفسى أعرف مين اللى كتب الكلمتين الحلوين أوى أوى.المعنى اللى أردته اننا فعلا بنرسم لوحة كبيرة وجميلة جدا منا اللى بيرسم جزء فوق ومنا اللى بيرسم جزء تحت ومنا اللى بيرسم فى الجهة اليمين ومنا اللى بيرسم فى الجهة الشمال تفتكروا أهم جزء فين ؟ طبعا كل الأجزاء مهمة لو جزء ما كملش أكيد اللوحة كلها مش ها يبقى لها طعم علشان كدا نفسى نتعامل بهذه الروح إننا نكمل جهد بعض علشان يصب فى اتجاه واحد ومش معنى كلامى اننا ها نكون نمط واحد أو مكرر أبدا احنا ها نختلف وها نعبر لبعضنا عن اختلافنا لكن فى النهاية يظل دائما الحب والإحترام المتبادل علشان نكمل اللوحة وأحب أضيف ان هناك أسماء مدونات أخرى لم أذكرها لكن مش معنى كدا ان اللوحة مش محتاجاهم وكمان محتاجه لكل جهدهم فأرجو أن يسامحونى أننى لم أتناول أسماء مدوناتهم وأنا فى انتظار مشاركتكم

رسالة للناشطه الحقوقيه ا/ سحر السيد

ليسمح لى الجميع بكتابة الرد هنا على رسالة الناشطة سحر السيد ونشرت فى مدونة أمواج التغيير.من قال لسيادتك أن الإخوان صامتون ولا يفعلون شيئا أو أنهم سعداء وهم يعيشون دور الضحية المسألة أن منهج التغيير الصحيح الذى يؤتى ثماره الناضجة لابد أن يأخذ وقته والإستعجال هنا ليس فى صالح الهدف الذى نسعى له وأنا لا أقف متفرجا حتى يمر الوقت أو أننى أفوت الفرص بل أعمل وأعمل وأتواصل وأتعلم ........وأشياء كثيرة جدا. الخلاصة لنسأل أنفسنا سؤال هل توجه الضربات لخصم منتهى ومهزوم أم لخصم ما زال يستعصى على الهزيمة؟ وهنا يظهرجليا من المنتصر؟ بمعنى أن الإستمرار بخطوات ثابتة نحو الهدف هو أقوى رد يمكن أن يرد به الإخوان على الضربات وهذا ليس دلالة على الضعف أو عدم وجود الرؤية وغيره مما يطرأ على ذهن الكثير.الآن نتكلم من وجهة اخرى يا ترى بما يستقوى النظام فيما يفعله عامة وليس فقط تجاه الإخوان؟ أهم ما يستند إليه النظام هو الكتلة الصامتة طيب وأهم ما يسعى إليه الإخوان بعد رضا الله هو ان تتكلم الكتلة الصامتة وليس فقط الكلام بل وتتحرك أيضا وهنا يتضح أمامنا الميدان الحقيقى للعمل وبذل الطاقات. والقوى فعلا هو من لا يستطيع أحد أن يلهييه أو يثنيه عن أهدافه..وأظن يتضح هنا من الأكثر رؤية وبصيرة .هل ينكر أحد أن المحاكمة العسكرية اذا قيست بالمنظور الإنسانى فهى ضد كل الأعراف الإنسانية وإذا قبست من الناحية القانونية فهى أيضا غير صحيحة بشهادة علماء القانون أخبرينى أختى الكريمة ألم تذكرى فى مقالك أنك خجولة من المواقف الرمادية للتيارات السياسية المصرية وإذا كانت قضية مثل هذه لايدرى عنها الشعب شيئا فضلا عن أنه ينصرها أو يساندها فهل هذا هو الوقت المناسب لما ذكرت سيادتك ؟ وبصراحه رسالة حضرتك قيمة جدا وتدل حقا على حب لهذا البلد وحرص عليه

أسماء وأسماء

فى (الفجريه) تقول (اناكده) يرد (طب ليه كدا) الأفضل (فتح عينيك) لا أنا بأقول (عيش ندل تموت محروق) يا عم انت(لسه عايش) أصلى (صريح أوى) طيب ايه رأيك (ارحم دماغك) و (انسى) بس أنا (مش عارف) خلاص ها تكون (مواطن مصرى واخد على قفاه) لا وألف لا دا أنا (العسكرى عتريس) طيب وايه يعنى دا (أنا اخوان)

وهى (اخت مسلمه) انت بتقول ايه دا (العميد ميت) وتعالى نعيش فى (ـصمتــ) لايمكن (لاللسكوت) حتى لو كنت فى (غربه) لكن فى خطوره جامده جدا لأنى (انا محظوره) ولا يهمك (أمواج التغيير ) جايه .لاانا نفسى فعلا اكون

(أمير الهدوء) امال مين يعمل (شخبطه فكريه) و(طرقعة كيبورد) ويعلى صوته (فليعد للدين مجده) وبعدها ييجى

(الشاب الحر الأبى) وشوفوا مين معاه كمان (الارهابى) ويقولوا فى صوت واحد (يا دعوتى سيرى) احنا طريقنا

(صلاح وإصلاح) ياه دا خلاص فعلا(انـــــــــــــــــــــــــــــــــــــــــا حـــــــــــــــــــــــــــر)

نتشارك لنصل لرؤية صحيحة

وجهة نظر نقلتها لى إحدى بناتى معبرة فيها عن رأى الكثيرات مثلها عن انه لايصح عرض صور للبنات المدونات وقالت:( ازاى انا أعرض صورتى ومن قبلها كنت قد دونت الكثير من المشاعر والأحاسيس ثم تكون مشاعا للناس كلها ..زمان كانت الحاجات إلا فيها احاسيس خاصة بتنزل ونقول اصل الا بيقرأ ما يعر فش دى مين. اما الآن كله أصبح معروف طيب هو ينفع أحكى مشاعرى وأشياء تخصنى للولاد ؟؟؟) وبصراحه احترت جدا لأن وجهة النظر الأخرى تقول :(مافيهاش حاجه خالص لأن الصور بنفس الهيئة الا بأكون خارجه بيها وكل الناس ترانى ) فيرد الرأى الآخر (وانا ماشيه الناس ترى واحده ماشيه وخلاص. مش واحده كل حاجه عن مشاعرها وخصوصيتها معروضه وموثقه بالصوره ) انا بصراحه ربنا الهمنى فكره معقوله ونفكر برضه فى حلول تانيه ممكن المدونه تكون مدونتين واحدة عامة لاتحمل الصور أو المشاعر الخاصه والأخرى فيها كل الا نفسنا فيه بس دى ماأسمحش بدخول الا قائمة محددة من البنات صحابى

الا نفسى انهم يشاركونى صورى واحاسيسى ..... ايه رأيكم؟؟؟؟

حاجه تحير فعلا

يا ترى ايه الصح؟ مرتين يحصل إن اخت من احبابى تتصل الساعه الثانيه قبل الفجر تخبرنى ان زوجها قبضوا عليه دلوقتى وتنبهنى انى استعد لاستقبالهم وطبعا نقوم ويحصل قلق وتحضير الشنطه وخلافه.. الغريب انه يحصل إن زوجى ما يكونش مطلوب فى المرتين

الا انا محتاره فيه فعلا اتصل بحد اصحيه فى وقت زى كدا لو كنت متخيله انهم ممكن ينزلوا من عندنا عليه ولا ما اتصلش واعمل قلق وممكن ما يكونوش رايحين عليه فعلا انا باكون محتاره جدا وباحزن جدا لما ييجى فى بالى انى اتصل بحد انبهه واتراجع خوفا من القلق الممكن انه يحصل وافاجأ انهم راحوا لهم بعدنا ......حاجه تحير ولا لأ؟

ثم كانت هذه المدونة ...

بعد تفكير وتردد كانت هذه المدونة التى اسأل الله ان يجعلها مسارا من مسارات الخير وطريقا للإصلاح .التفكير والتردد كانا لأسباب كثيرة وأهمها طبعا ضيق الوقت وخشية أن تكون مجرد رقم يحصى فى المدونات دون إضافة فعلية و كذلك مهارات التعامل مع الكمبيوتر ليست على ما يرام وقطع على ترددى أملى فى دعمكم لى بالتوجيه والآراء وعزمى على التعامل مع كل ماهو جديد والتعلم منه قدر الإستطاعة

تصورى للمدونة أنها ستعكس الكثير مما يدور فى خاطرى وأنها قد تحكى عن ذكريات وقد تقصر المسافات بيننا وبين الكثيرين

فقد تتناول العام والخاص ، والحديث والقديم ، والحاضر والمستقبل ، والجديد فى حياتنا. ولنتواصل ونتحاور ولنختلف كما يحلو لنا لكن لنتعاهد أن يبقى دائمًا الحب والإحترام المتبادل والتناصح فى الله ولله